A wani jawabi da ya gabatar domin bikin Ranar Dimokuraɗiyya, Shugaban ƙasa Bola Ahmed Tinubu ya yaba da yadda tsarin dimokuraɗiyya a Najeriya ya jure ƙalubale tun bayan dawowar mulkin farar hula a shekarar 1999. Ya ce duk da matsalolin da ake fuskanta, ƙasar na ci gaba da tafiya a turbar doka da oda.
Tinubu ya tuno da jaruman gwagwarmayar dimokuraɗiyya, musamman marigayi Moshood Kashimawo Olawale Abiola, wanda aka soke zaɓensa na 1993. Ya ce irin sadaukarwar da waɗannan mutane suka yi ne ya ba Najeriya damar samun tsarin mulki mai ɗorewa a yau.
Shugaban ya kuma yi nuni da yadda ake warware rikice-rikicen zaɓe ta hanyar kotuna maimakon tashin hankali, yana mai cewa hakan alama ce ta ci gaban dimokuraɗiyya. Ya ƙara da cewa sauye-sauyen mulki cikin lumana sun ƙara tabbatar da kwanciyar hankali a ƙasar.
Dangane da tsaro, Tinubu ya bayyana cewa an samu gagarumin ci gaba a yaƙi da ta’addanci. Ya ce rahotanni sun nuna raguwar mace-macen da ke da nasaba da ta’addanci da kusan kashi 81 cikin ɗari tun daga shekarar 2015. Haka kuma, ya bayyana cewa an kashe kuɗaɗe masu yawa wajen ƙarfafa rundunonin tsaro, inda aka ce an hallaka dubban ’yan ta’adda a bara.
Sai dai ya nuna damuwa kan sace-sacen mutane, musamman yara, a jihohin Oyo da Borno, yana mai cewa gwamnati na ci gaba da ƙoƙarin ganin an kubutar da su lafiya. Ya buƙaci jama’a su kasance masu haƙuri tare da bayar da haɗin kai ga jami’an tsaro.
A ɓangaren tattalin arziki kuwa, shugaban ya ce ana fara ganin alamun farfaɗowa, inda kuɗaɗen shiga na gwamnati ke ƙaruwa tare da bunƙasar fitar da kayayyaki zuwa ƙasashen waje ba tare da dogaro da man fetur kaɗai ba. Ya ja kunnen matasa da su rungumi damar da ke cikin ƙasar maimakon neman mafita a waje kawai.
Tinubu ya kuma yi kira da a tabbatar da gaskiya da adalci a zaɓukan da ke tafe a jihohin Ekiti da Osun, yana mai cewa sahihin zaɓe na daga cikin ginshiƙan dimokuraɗiyya mai ƙarfi.
A ƙarshe, ya buƙaci ’yan Najeriya da su ci gaba da bayyana ra’ayoyinsu cikin gaskiya da lumana, tare da yarda da tsarin dimokuraɗiyya a matsayin hanyar warware matsaloli da gina makomar ƙasa. Ya ce haɗin kai da jajircewa su ne mabuɗin ci gaban Najeriya.
Fellow Nigerians
— Bola Ahmed Tinubu (@officialABAT) June 12, 2026
Today, we celebrate democracy and the enduring Nigerian spirit. For 27 unbroken years, since May 29, 1999, Nigerians have chosen their leaders through the ballot, witnessed peaceful transitions of power, and resolved disagreements in courtrooms and legislative…